"Azərbaycanda aqrar sığorta: İnkişaf və perspektivlər" mövzusunda tədbir keçirilib

Aqrar Sığorta Fondunun təşkilatçılığı ilə "Azərbaycanda aqrar sığorta: İnkişaf və perspektivlər" mövzusunda tədbir keçirilib. Tədbirdə Kənd Təsərrüfatı Nazirliyi, Aqrar Sığorta Fondu, Medianın İnkişafı Agentliyi, Azərbaycan Respublikasının Kosmik Agentliyi  (Azərkosmos), “Agro Dairy” şirkətinin əməkdaşları, fermer və təsərrüfat sahibləri, o cümlədən kütləvi informasiya vasitələrinin nümayəndələri iştirak edib.

Tədbirdə giriş sözü ilə çıxış edən Aqrar Sığorta Fondunun İdarə Heyətinin sədri Fuad Sadıqov bildirib ki, aqrar sığorta mexanizmi dövlətin aqrar sektora dəstəyinin növbəti addımıdır. 2019-cu ildə Azərbaycan Respublikasının Prezidenti cənab İlham Əliyevin Fərmanı ilə yaradılan Aqrar Sığorta Fondu ötən 5 il ərzində maliyyə dayanıqlı bir təşkilata çevrilərək fermerlərin risklərini uğurla qarşılamaqdadır. Fond sədri bildirib ki, yeni yaradılmış aqrar sığorta mexanizmi dövlətin fermerlərə dəstəyinin daha bir nümunəsi olmaqla yanaşı, dövlətin və fermerlərin bu sahəyə yatırdığı investisiyaları qoruyur. Xüsusilə iqlim dəyişiklikləri dövründə aqrar sığorta mexanizmi təsərrüfatları çoxsaylı risklərdən, o cümlədən təbii fəlakətlərdən qoruyur. Hazırda aqrar sığorta mexanizmi vasitəsilə 41 növ bitki, heyvandarlıq və balıqçılıq təsərrüfatlarını sığortalamaq mümkündür. Son günlər ölkə ərazisində havaların qeyri-sabit və soyuq keçdiyini xatırladan Fond sədri bildirib ki, aqrar sığorta əkinləri, xüsusilə meyvə bağlarını şaxtavurma riskindən də sığorta edir və bu hadisələr üzrə ödənişlər edilir.

Fuad Sadıqov aqrar sığorta sistemində mühüm yer tutan müstəqil aqrar sığorta ekspertləri üçün yaradılan imkanlardan da bəhs edib. Fond sədri ekspertlərin gəlirlərinin yüksək olduğunu qeyd edərək kənd təsərrüfatı sahəsi üzrə ixtisaslaşmış şəxsləri aqrar sığorta eksperti kimi çalışmağa dəvət edib. 

Tədbirdə çıxış edən kənd təsərrüfatı nazirinin müşaviri Zaur Əliyev ölkə iqtisadiyyatı üçün mühüm sahə olan aqrar sahənin davamlı inkişafında aqrar sığortanın əhəmiyyətini qeyd edib. Bildirib ki, aqrar sığorta mexanizminin yaradılması sektorun inkişafı və ərzaq məhsullarının istehsalının artırılmasında önəmli yer tutur. Kənd təsərrüfatı sahələrinin baş verə biləcək risklərdən sığortalanması bölgələrdə məşğulluğun artırılmasına, ərzaq təhlükəsizliyinin daha da möhkəmlənməsinə, bu sahədə ixrac potensialının yaxşılaşdırılmasına imkan verəcək.

Medianın İnkişafı Agentliyinin şöbə müdiri Elşən Ağayev isə belə tədbirlərin jurnalistlərin ixtisaslaşması və iqtisadi proseslərin düzgün işıqlandırılması baxımından mühüm olduğunu bildirib.

Tədbirdə “Dünyada və Azərbaycanda aqrar sığorta mexanizmi, risklər və məhsullar”, “Aqrar sığorta hadisələri və zərərlərin tənzimlənməsi”, “Azərbaycanda aqrar sığorta: İnkişaf və perspektivlər" mövzularında təqdimatlar keçirilib. Təqdimatlarda təbiət hadisələrinin əkin sahələrinə vurduğu zərər,  zərərlərin araşdırılması və qarşılanması prosesi ətraflı izah edilib. “Azərkosmos”un nümayəndələrinin “Kosmik texnologiyalar aqrar sektorun xidmətində” mövzusunda keçirdikləri təqdimatda peykdən əkin sahələrinin monitorinqi imkanları əyani nümayiş olunub və bu monitorinqin əhəmiyyətinə toxunulub.

Bundan başqa, jurnalistlərin bölgədəki fermerlərlə birbaşa ünsiyyətinə şərait yaradılıb. Əkin sahəsinə dəymiş zərərə görə Aqrar Sığorta Fondundan ödəniş almış Ağsu rayonunun Abasxanlı kəndindən olan fermer Rasim Məmmədov tədbirə onlayn qoşularaq baş vermiş sığorta hadisəsi, sığorta ödənişini alması barədə ətraflı məlumat verib. O, aqrar sığorta mexanizmindən məmnun qaldığını bildirərək digər fermerləri də əkin sahələrini sığorta etməyə çağırıb.

Toplantıda Aqrar Sığorta Fondunun 2024-cü il üzrə nəticələri də açıqlanıb.  Bildirilib ki, 2024-cü ildə Azərbaycanda aqrar sığortaya maraq artmaqda davam edib. Belə ki, ötən il sığortalanan əkinlərin sahəsi 447 min hektara çatıb. Bu, 2023-cü illə müqayisədə 25 min hektar və ya 6% artıqdır. Ötən il aqrar sığortanın əhatə dairəsi genişlənib və Naxçıvan Muxtar Respublikasında Fondun yeni filialı fəaliyyətə başlayıb.

Sonda jurnalistlərin mövzu ilə bağlı çoxsaylı sualları cavablandırılıb.

Qeyd edək ki, aqrar sığorta məhsulları, məhsul şərtləri, təklif olunan sığorta zərfləri, təminat verilən risklər barədə ətraflı məlumatı Aqrar Sığorta Fondunun www.asf.gov.az rəsmi vebsaytından və ya “1651” Çağrı Mərkəzinə müraciət etməklə almaq olar.