Çəltikçilk sahəsində beynəlxalq əməkdaşlıq genişlənir

Kənd təsərrüfatının ənənəvi sahələrindən olan çəltikçiliyin inkişaf etdirilməsi, əhalinin düyüyə olan tələbatının daxili istehsal hesabına ödənilməsi, çəltikçilik sahəsində elmi təminatın və kadr potensialının gücləndirilməsi istiqamətində son  illərdə  bir sıra əhəmiyyətli tədbirlər görülüb. Çəltikçilik sahəsində fəaliyyət göstərən beynəlxalq, regional və milli qurumlarla əməkdaşlıq əlaqələri genişləndirilir. Əkinçilik Elmi-Tədqiqat İnstitutu (ETİ) bu bitkinin xəstəlik və zərərvericilərə davamlı və məhsuldar sortlarının yaradılması, həmçinin kadr hazırlığı sahəsində Mərkəzi və Qərbi Asiya Çəltik Mərkəzi (CWARice) və Türkiyə ilə əməkdaşlıq edir. 

Azərbaycan Respublikasının Malayziyadakı səfirliyinin təşəbbüsü ilə çəltikçilik sahəsində Əkinçilik ETİ ilə Malayziya Kənd Təsərrüfatı Tədqiqat və İnkişaf İnstitutu (MARDİ) arasında onlayn görüşlər keçirilib və nəticədə Əməkdaşlığa dair Memorandum layihəsi hazırlanıb. Memorandumun imzalanması və qarşılıqlı müzakirələrin aparılması məqsədilə MARDİ-nin direktoru Dr. Mohamad Zabavinin rəhbərliyi ilə həmin institutun nümayəndə heyəti Azərbaycanda səfərdə olub. 

Səfər çərçivəsində nümayəndə heyəti, həmçinin Malayziyanın Azərbaycan Respublikasındakı səfiri Dato Yubazlan Yusof Əkinçilik ETİ-də və Lənkəran rayonunda olublar. Əkinçilik ETİ-də tədqiqat infrastrukturu ilə tanışlıqdan sonra tədqiqat heyəti ilə elmi müzakirələr aparılıb, atılacaq növbəti addımlar müzakirə edilib.

Görüşdə Kənd Təsərrüfatı Nazirliyinin Bitkiçiliyin təşkili və monitorinqi şöbəsinin müdiri İmran Cümşüdov ölkədə əkinçilik sistemləri, prioritet bitkilər, torpaq və iqlim şəraiti, kənd təsərrüfatı sahəsində qəbul edilmiş dövlət  proqramları, məhsul istehsalçılarına göstərilən dövlət dəstəyi və çəltikçiliyin mövcud vəziyyəti barədə məlumat verib.

Görüşün sonunda Əkinçilik ETİ-nin direktoru Faiq Xudayev və MARDİ-nin direktoru Dr. Mohamad Zabavi Əməkdaşlığa dair Memorandum imzalayıblar.

Daha sonra səfir və nümayəndə heyəti çəltik emalı müəssisələri ilə tanış olmaq, çəltikçiliyin mövcud vəziyyəti ilə bağlı yerli istehsalçılarla müzakirə aparmaq üçün Lənkəran rayonuna səfər ediblər. Lənkəran Dövlət Aqrar İnkişaf Mərkəzində (DAİM) keçirilən müzakirələrdə Lənkəran, Masallı, Astara DAİM-lərin rəhbərləri və əməkdaşları, Lənkəran Aqrar İnnovasiya Mərkəzinin direktoru, fermerlər iştirak edib.

Tədbirdə Lənkəran DAİM-in direktoru Tofiq Rzayev bölgədə çəltikçiliyin vəziyyəti, Əkinçilik ETİ-nin direktoru Faiq Xudayev isə seleksiya və toxumçuluq işlərinin vəziyyəti barədə məlumat veriblər.

Fermerlər məhsuldarlığın artırılmasında sertifikatlı toxumun əhəmiyyətli rolu olduğunu vurğulayıblar.

Nümayəndə heyəti Lənkəran rayonunda fəaliyyət göstərən bir sıra özəl müəssisələrdə həyata keçirilən emal prosesi ilə də tanış olub.